Lichterprozession in Oies

“Avëi fede ó dì odëi cun l’ cör”

N sabeda, ai 31 de merz 2012 , à la Schira Jonila y i Minis dla Val Badia metü a jì la tradizionala prozesciun de carsëma, da Badia a Oies, perian les staziuns che condüj da San Linert sö ćina ala ćiasa de sant Ujöp. Passa 100 porsones é ruvades adalerch por l’ocajiun, dandadöt jogn y ministranć dles cöres dla Val Badia, mo al é inće gnü cotan de geniturs che à orü acompagné i mituns y partì cun ëi na bela esperiënza de fede. I tesć dles staziuns, lić dant dai ministranć, metô adüm la pert dla Via Crucis tradizionala cun val’ picia storia fora dla vita de sant Ujöp. Da inultima gnêl na domanda che orô ester n pic ejam de cosciënza, n invit a ciarè it’ te nos y odëi tan dalunc o tan daimprò che i sun da l’ejëmpl de sant Ujöp. Danter staziuns y oraziuns, s’à la prozesciun trat bel plan ite y sö a Oies.

Dailò él spo ste siur Pire ch’à tut ite i pici pelegrins te dlijia, y ti à dit n pêr de pinsiers ai ministranć ruvà adalerch. Al à baié de sant Ujöp, alzan fora dui aspeć de süa vita y de süa testimonianza de fede. Al à recordè les dificoltês y les crusc dl jonn siur Ujöp, canche al ê ruvé tla Cina, amesa la jënt che ne cherdô nia, y ê gonot inće ria laprò. A un che ti à damanè ći che la fede orô dì, ti à Ujöp respognü cun l’ejëmpl dl sorëdl ascognü dales neores: inće sce nos ne podun nia l’odëi, impò savunse che l’ sorëdl é sö tl cîl. Insciö éra inće cun Chël Bel Dî. Nos ne l’udun nia, mo i savun che al é dagnëra pro nos. “Avëi fede ó dì odëi cun l’ cör”. Y l’ater fat che siur Pire à cuntè sura la vita dl sant da Oies é lié ales dificoltês de comunicaziun danter les popolaziuns che baia atri lingać. Sant Ujöp conesciô tröć lingać, danter chisc baiâl döes variantes cinejes, mo al à messü imparè ćiamò tröp laprò, denant ch’ ester bun da jì ite tl cör dles porsones. Y da inultima àl dit üna na cossa dër tlera: “L’ lingaz che düć capësc é l’ lingaz dl amur”. Do chëstes beles parores, à siur Pire invé düć canć da jì sö da altè a veneré la relicuia de sant Ujöp y a se perié jö süa interzesciun y süa proteziun sura de nos. Al é spo gnü ćiantè deboriada la ćiantia cun les parores dl sant “O munts y vals ladines”. Do la funziun él ćiamò ste n pü de aorela cürta, cun n bun soft y biscoti pur düć.

(c.s.) Minis Al Plan